Hoxe voleibol en Educación Física!

Hoxe tocoulle á clase de 5º de Educación Primaria vivir unha sesión diferente en Educación Física. Estivemos practicando voleibol cun monitor do programa XOGADE, do club de voleibol Maniotas de Cangas. Estivemos practicando os diferentes tipos de golpeos na rede, algo complicado ao principio, pero pouco a pouco fómonos adaptando.

 

Convivencia no Gatañal co Balonmán Cangas

Hoxe volvemos a vivir unha xornada especial de convivencia no pavillón do Gatañal, con outros coles de O Morrazo. Estivemos a facer unhas pequenas competicións con mini partidos entre os coles, arbitrados polos monitores do club e facendo de adestradores de cada equipo os propios xogadores da primeira plantilla do balonmán Cangas. Unha experiencia fabulosa para o noso alumnado que seguro que non esquecen!

 

Xornada especial de balonmán na escola

Durante estas dúas semanas estivemos a recibir no noso centro a monitores e xogadores do club Bolonmán Cangas, dentro da modalidade actividade deportiva escolar do programa XOGADE. O noso alumnado de 3º a 6º de Educación Primaria iniciouse nos fundamentos do balonmán e puideron compartir actividade física e deportiva cos xogadores do primeiro equipo. Neste caso, a clase de 3º puido facerlle uns lanzamentos ao gardameta Mateo Pallas.

 

Unha milla terrorífica!

Este ano volveu a milla terrorífica. Despois de varios anos sen poder facela por cuestións meteorolóxicas, este ano a nosa ANPA Madreboa organizou unha auténtica milla do terror para conmemorar a celebración do Samaín. Foi un traballo espectacular das nosas familias e o resultado podédelo ver aquí. A verdade é que toda a comunidade educativa estivo encantada. Pola tarde a milla estivo aberta para que a puideran disfrutar outras persoas e a crítica foi fabulosa.

Cros zonal O Morrazo

Hoxe tivo lugar unha nova edición do cros zonal da zona de O Morrazo, nas inmediacións das pistas de atletismo de A Xunqueira en Moaña. Esta proba forma parte do programa XOGADE e é clasificatoria para o campionato provincial.

A xornada estivo moi fresca posto que estaba nublado e o noso alumnado pasouno moi ben. Conseguiron algúns podios e agora falta saber se algunha das nosas aulas consegue esa clasificación provincial.

Xa temos pista de voley praia!

Estreamos pista de voley praia! Tiñamos unha zona de patio verde que non nos daba moito xogo, xa que cando chovía estaba encharcada e cando lle crecía moito a herba era impracticable. Deste xeito, optamos por darlle un novo uso a ese espazo e creamos unha pista de voley praia. Fixemos un perímetro con tubo de alcantarilla, nivelamos o chan, puxemos unha manta anti herbas e mandamos vir area de sílice. 

Agora temos un novo espazo de xogo e unha alternativa máis para o tempo de lecer. De xeito que seguimos adiante cos obxectivos do noso PVAD, de impulsar a actividade física en horario lectivo e de crear novos espazos para a practica deportiva.

 

Xornada de atletismo en pista en A Xunqueira

Hoxe vivimos unha xornada de atletetismo en pista en A Xunqueira, dentro da modalidade de Actividade deportiva escolar do programa XOGADE. O noso alumnado estivo competindo con outros coles de O Morrazo en probas como salto de lonxitude, lanzamento de peso, 500 m, 60 m e relevos. A ver se temos sorte e conseguimos a clasificación para a fase provincial.

 

Como auténticos xogadores no Gatañal!

Hoxe o noso alumnado de 5º de Educación Primaria viviu unha xornada de convivencia deportiva no pavillón do Gatañal. Estivemos a disputar pequenos encontros de balonmán con outros centros de Moaña. Estivemos acompañados por monitores e xogadores do Balonmán Cangas. Unha experiencia moi agradable. Finalmente fixemos unha gran foto de grupo para inmortalizar a xornada.

Ping pong co mundialista Nigel Webb!

Hoxe tivemos no noso centro a Nigel Webb, actualmente adestrador de ping pong e xadrez no Centro Recreativo Cultural de Redondela. Nigel, de nacionalidade xamaicana, é un apaixonado do ensino. Foi número un no ranking xamaicano de ping pong durante máis de 15 anos e participou en 4 mundiales polo seu país de orixe. Adestrou en China, onde adquiriu moita experiencia e adaptou a súa filosofía de xogo.

Estivo a ensinarnos unha serie de exercicios básicos e o noso alumnado estivo moi motivado. Sen dúbida, unha honra para nós telo no noso centro e aprender un pouco del.

 

A nadar!

Este curso seguimos adiante co programa de piscina para 6º de E. Primaria, grazas á colaboración entre o concello de Moaña, que nos pon o autobús, e ao Centro Deportivo de Moaña, que nos ofrece unha tarifa reducida. Así poderemos gozar de actividades acuáticas. Serán sesións dirixidas polo mestre de Educación Física, baixo a supervisión dos monitores e socorristas do centro.

Así, podemos poñer en práctica algunhas habilidades dos diferentes estilos de natación e algúns xogos acuáticos.

 

Cros provincial en Portas

Hoxe tivo lugar o cros provincial en Portas, a onde levamos clasificadas as nosas aulas de 4º, 5º e 6º de Educación Primaria. Foi unha xornada agradable, na que puidemos convivir unha vez máis con outros centros. O noso alumnado competiu moi ben e incluso houbo algún podio.