Visita das remeiras do S.D. Tirán

Hoxe visitáronnos as rapazas remeiras do S.D. Tirán. Viñeron a presentarnos o seu clube e, sobre todo, a falar do papel femenino no remo actual. Unha charla moi interesante que enseguida estivo acompañada de xogos de quecemento para terminar cunhas actividades no ergómetro. Unha maneira de enganchar aos máis pequenos na práctica desta modalidade tan tradicional no noso concello.

 

Almorzos saudables

Hoxe o noso alumnado de 4º de E. Primaria viviu unha xornada de alimentación saudable nas instalacións do antiguo Makore. Todo isto grazas a unha iniciativa do Patronato Municipal Beiramar, co seu obradoiro Moaña Laboura de hostelería. Así puidemos participar na elaboración e degustación de pratos para termos un almorzo diferente e máis saudable. Unha iniciativa fabulosa que o noso alumnado acolleu con moito éxito.

 

Xornada muitixogo en Reibón e Seara

Hoxe tivemos unha xornada multixgo co noso alumnado de 1º e 2º de E. Primaria, dentro do programa XOGADE. Nesta ocasión xuntámonos varios centros de O Morrazo nas instalacións dos centros do CEIP Seara e CEIP Plurilingüe de Reibón. Fixemos varios xogos de puntería, desprazamentos, coordinación e cooperación.

 

Xornada de atletismo no CGTD

No día de hoxe estivemos no CGTD de Pontevedra, para disputar a fase provincial de atletismo na escola, logo de clasificarnos na xornada previa que tivera lugar no IFEVI. Aquí competimos con outros centros da provincia que se clasificaron nas súas fases zonais. Puidemos gozar ademais dunhas instalacións oficiais e federadas.

Benvidos Abelendo!

Hoxe recibimos a visita do CEIP de Abelendo de Moaña, para practicar modalidades deportivas, dentro do programa XOGADE. Trátase de encontros multideportivos que organizamos a través da Agrupación Deportiva Areas Gordas, deste xeito facémonos visitas deportivas entre os centros de Moaña.

Neste caso, comezamos cunha breve presentación de benvida ao alumnado de Abelendo e aos seus mestres acompañantes.

Logo estivemos practicando modalidades coma baloncesto, balonmán, xogos de mesa como xadrez, etc., tanto con equipos misturados entre coles como por separado, posto que hai un aspecto competitivo nestas actividades que merece a pena ser tratado desde os coles, lonxe do que habitualmente se vive nos clubes deportivos.

Para finalizar fixemos un encontro de Datchball no ximnasio e inmortalizamos a xornada cunha gran foto de familia.

Semana da froita

Esta semana comezamos un novo período de quinde días de reparto de froita, grazas ao programa de Froita na Escola do FOGGA. Nestas dúas semanas repartiremos dez variedades de froitas distintas, para que o noso alumnado intente adquirir hábitos de incluír máis froita nas súas merendas e, ao mesmo tempo, experimente con outras froitas menos habituais.

 

De visita deportiva a Quintela

Hoxe desplazámonos ao CEIP de Quintela para outra xornada deportiva, dentro do programa XOGADE. Para chegar alí fomos camiñando, aproveitando o bo tempo e que non queda moi lonxe. Desta maneira poñemos en práctica os obxectivos do nos PVAD de incrementar a carga de actividade física en horario lectivo.

Estivemos practicando modalidades coma baloncesto, balonmán, hockey, etc., en quendas nas que os equipos estaban misturados para favorecer a convivencia entre o alumnado.

Para poñer fin á xornada estivemos practicando Datchball no ximnasio e rematamos cunha gran foto de familia.